News

(ሀምሌ 23/2018 ዓ.ም)፣ ከከፍተኛ ትምህርት ተቋማት አመራሮች ጋር በጋራ ጉዳዮች ላይ ትኩረት አድርጎ ሲካሄድ የነበረው የውይይት መድረክ በተሳካ ሁኔታ ተጠናቋል። በውይይት መድረክ ላይ የዩኒቨርሲቲ ፕሬዘዳንቶች፣ ምክትል ፕሬዘዳንቶች እና ጥሪ የተደረገላቸው ከፍተኛ የሥራ ኃላፊዎች ተሳታፊ ነበሩ።

በመድረኩ የባለስልጣኑ የ2018 በጀት ዓመት የሥራ አፈጻጸም እና የ2019 በጀት ዓመት ዕቅድ በኢጂፒ ፕሮጀክት ማናጀር አቶ ያፌት መኮንን የቀረበ ሲሆን የዘላቂ ግዥ አፈጻጸም ማኑዋል እና የአደገኛ ቆሻሻ አያያዝ፣ አጓጓዝ፣ አጠቃቀምና አወጋገድ ማኑዋል በመንግስት ግዥና ንብረት ማሻሻያ እና አቅም ግንባታ መሪ ስራ አስፈጻሚ አቶ መላኩ ተጓዴ ቀርቦ ውይይት ተደርጎበታል።

በተጨማሪም በአዲስ አበባ ሳይንስና ቴክኖሎጂ ዩኒቨርሲቲ የተጠናው የአደገኛ ቆሻሻ አያያዝ፣ አጓጓዝ፣ አጠቃቀምና አወጋገድ ጥናት በጥናት ቡድኑ ቀርቦ ውይይት ተደርጎበታል።

ተሳታፊዎቹ በቀረቡት አጀንዳዎች ላይ በንቃት የተሳተፉ ሲሆን በተለይም ከመንግስት ኤሌክትሮኒክ ግዥ (e-GP) ስርዓት፣ አጠቃላይ ከግዥ አካሄዶች፣ ዘላቂነት ያለው ግዥን እውን ማድረግ በሚቻልበት ሁኔታ እና ከአደገኛ ቆሻሻ አያያዝ፣ አጓጓዝ፣ አጠቃቀምና አወጋገድ ጥናት ጋር ተያይዞ በርካታ ጥያቄዎችን፣ አስተያየቶችንና ገንቢ ሃሳቦችን አንስተዋል።

በቀረበው ጥናት ላይ ለተነሱ ጥያቄዎችና አስተያየቶች በጥናት ቡድኑ እንዲሁም በሌሎች ተቋማዊ ጉዳዮች ላይ ከባለስልጣኑ የሥራ ኃላፊዎች አስፈላጊው ማብራሪያና ምላሽ ተሰጥቶበታል።

በመጨረሻም የባለስልጣኑ ዋና ዳይሬክተር ክብርት ወ/ሮ መሰረት መስቀሌ የማጠቃለያ ንግግር ያደረጉ ሲሆን በንግግራቸውም የቀረቡት ሰነዶችና የተደረጉት ውይይቶች ወደፊት የሚከናወኑ የጋራ ሥራዎችን በላቀ ደረጃ ለማስፈጸም ያላቸውን ከፍተኛ አስተዋጽኦ ገልጸዋል።

(ሀምሌ 22/2018 ዓ.ም)፣ የኢፌዴሪ የመንግስት ግዥና ንብረት ባለስልጣን በክረምት ወራት ከሚያከናውናቸው የበጎ አድራጎት ተግባራት አካል የሆነውን የማዕድ ማጋራት መርሃ ግብር በመቄዶኒያ የአረጋውያንና አዕምሮ ህሙማን መረዳጃ ማዕከል በመገኘት በዛሬው ዕለት በደመቀ ሁኔታ አከናወኗል። ባለስልጣን መስሪያ ቤቱ በዚህ የበጎ አድራጎት መርሃ ግብሩ ለ1,000 የሚሆኑ የማዕከሉን አባላት የምገባ አገልግሎት በማካሄድ ለአረጋውያንና አዕምሮ ህሙማን ያላቸውን ፍቅርና አክብሮት ገልጸዋል።

ባለስልጣኑ በየአመቱ በሚያካሂደው በጎ ተግብር የተነሳ ቀደም ሲል ሀምሌ 23 በመቄዶኒያ የአረጋውያንና አዕምሮ ህሙማን ማዕከል የባለስልጣኑ ቀን ተብሎ የተሰየመ ቀን ነው። ይህ እንደተጠበቀ ሆኖ በ2018 በጀት ዓመት 347,491 ብር የሚገመት የተለያዩ ቁሳቁሶች ድጋፍ አድርጓል።

በበጎ አድራጎት መርሃ ግብሩ ላይ በአካል ተገኝተው ህሙማኑንና አረጋውያኑን ያበረታቱት የባለስልጣኑ ዋና ዳይሬክተር ክብርት ወ/ሮ መሰረት መስቀሌ እንደተናገሩት የማዕድ ማጋራት ዝግጅቱ ለወገኖቻችን ያለንን ጥልቅ አክብሮትና ፍቅር ለመግለጽ የተደረገ ነው ብለዋል። አያይዘውም ባለስልጣን መስሪያ ቤቱ ሁሌም ቢሆን ድጋፍና እርዳታ ከሚያስፈልጋቸው ወገኖች ጎን እንደሚቆም አረጋግጠዋል።

ዋና ዳይሬክተሯ አክለውም “ሰው ለመርዳት ሰው መሆን በቂ ነው” በሚል ጥልቅና ሰብአዊ መርህ በርካታ አረጋውያንና አዕምሮ ህሙማንን በማስጠለልና በመንከባከብ ላይ የሚገኘው መቄዶኒያ ትልቅ ሀገራዊና ሰው-ተኮር አገልግሎት የሚሰጥ አንጋፋ ድርጅት በመሆኑ እንዲህ ባሉ ቦታዎች ተገኝቶ አቅመ ደካሞችን መጠየቅና ማበረታታት የሁሉም አካል ሀገራዊና ሰብአዊ ኃላፊነት ነው ሲሉ ገልጸዋል።

የመንግስት ግዥና ንብረት ባለስልጣን በዛሬው ዕለት ባከናወነው የማዕድ ማጋራት መርሃ ግብር ብቻ የማይወሰን ይልቁንም በቀሪዎቹ የክረምት ወራት የተጀመሩ የበጎ አድራጎት ስራዎች ተጠናክረው የሚቀጥሉ ሲሆን  እንዲህ አይነቱ የበጎ አድራጎት እንቅስቃሴ ተቋሙ ለህብረተሰብ አገልግሎት የሚሰጠውን ትኩረትና ሰብአዊ እሴት በተግባር የሚያሳይበት አወንታዊ እርምጃ ነው።

የቤኒሻንጉል ጉሙዝ ክልል ፋይናንስ ቢሮ ከፌዴራል መንግስት ግዥና ንብረት አስተዳደር ባለስልጣን ጋር በመተባበር ለተመረጡ ተቋማት የኤሌክትሮኒክስ ግዥ ስርዓትን ተግባራዊ ለማድረግ የሚያስችል ቅድመ ትግበራ ስልጠና እየሰጠ ነው፡፡

የፌዴራል መንግስት ግዥና ንብረት ባለስልጣን የኤሌክትሮኒክስ መንግስት ግዥ ፕሮጀክት የአቅም ግንባታ አስተባባሪ አቶ ደበበ ማሞ እንዳሉት አሁን ላይ ሁሉም የፌዴራል ባለበጀት መስሪያ ቤቶች እና ከፍተኛ የመንግስት የትምህርት ተቋማት የኤሌክትሮኒክስ መንግስት የግዥ ስርዓትን ተግባራዊ እያደረጉ መሆናቸውን ገልፀዋል፡፡

የኤሌክትሮኒክስ መንግስት የግዥ ስርዓት ከሰው ንክኪ የፀዳና ወረቀት አልባ መሆኑ በዘርፉ ይስተዋል ለነበረው ችግር መፍትሔ ሆኗል ብለዋል፡፡

በኢትዮጵያ የግዥ ስርዓቱ ወጥ እንዲሆንና እንዲዘምን በተያዘው አቅጣጫ መሰረት የኤሌክትሮኒክስ መንግስት የግዥ ስርዓቱ በሁሉም ክልሎች ተግባራዊ እንዲደረግ የሚያስችል ስራ በተመረጡ ተቋማት ተጀምሯልም ብለዋል፡፡

የቤኒሻንጉል ጉሙዝ ክልል ፋይናንስ ቢሮ የግዥ ንብረት አስተዳደር ምክትል ኃላፊ ወ/ሮ ማዲያ አልበሽር በበኩላቸው በክልሉ በተመረጡ 10 ተቋማት የሚተገበረው የኤሌክትሮኒክስ መንግስት የግዥ ስርዓት ባለፉት ዓመታት ከግልፀኝነት ማነስ፣ ከጊዜ ብክነትና ከብልሹ አሰራር ጋር ተያይዘው ይነሱ ለነበሩ ችግሮች መፍትሔ የሚሰጥ መሆኑን አመላክተዋል፡፡

በተለይ ዘመኑ ያፈራቸውን የቴክኖሎጂ ውጤቶችን በመጠቀም የግዥ አሰራሮችን ዘመናዊ፣ ግልፅ፣ ፈጣንና ተጠያቂነትን በማስፈን የመንግስት ሀብትና ንብረት ለታለመለት ዓላማ ላይ እንዲውል ያስችላልም ብለዋል፡፡

የክልሉ ፋይናንስ ቢሮ ከፍተኛ የግዥ አማካሪ አቶ ከማል አብደላ እንዳሉት ደግሞ የኤሌክትሮኒክስ መንግስት የግዥ ስርዓት የመንግስት ሀብትና ንብረትን ለመቆጣጠር አስፈላጊነቱ ታምኖበት ከ2017 ዓ.ም ጀምሮ ዝግጅት ሲደረግ መቆየቱን አሳውቀዋል፡፡

በክልሉ ለትግበራው የተመረጡ ተቋማት በተያዘው በጀት ዓመት ወደ ሙሉ ትግበራ እንዲገቡ የሚያስችሉ ስራዎች በመሰራት ላይ ናቸውም ብለዋል፡፡

(#መረጃው የቤንሻንጉል ጉሙዝ ሚዲያ ነው)

(ሀምሌ 17/2018 ዓ.ም)፣ የኢፌዴሪ የመንግሥት ግዥና ንብረት ባለሥልጣን በአስተዳደርና አገልግሎት ማሻሻያ ሪፎርም የትግበራ ምዕራፍ አፈጻጸም ሪፖርት ሰነድ ላይ ከሠራተኞች እና ከሥራ ክፍሎች ኃላፊዎች ጋር የውይይት መድረክ አካሄደ::

በውይይት መድረኩ ላይ የሪፎርም አፈጻጸም ሰነዱን በአቶ መላኩ ተጓዴ የቀረበ ሲሆን በሰነዱ ላይም በዝርዝር ውይይት ተደርጎበታል:: ሰነዱ ባለሥልጣን መሥሪያ ቤቱ በተቋማዊ አቅም ግንባታ፣ በህግ ማዕቀፎች ማሻሻያ፣ በሰው ሀብት ልማት፣ በአገልግሎት አሰጣጥ እና በዲጂታላይዜሽን (e-GP እና e-Fleet Management) ዘርፎች ያከናወናቸውን አበይት ተግባራትና ያስመዘገባቸውን ውጤቶች የሚያሳይ ነው::

በመድረኩ ማጠቃለያ ላይ የመንግሥት ግዥና ንብረት ባለሥልጣን ዋና ዳይሬክተር ክብርት ወ/ሮ መሰረት መስቀሌ ማጠቃለያ ንግግር ያደረጉ ሲሆን የቀጣይ ሥራ አቅጣጫዎችንም አስቀምጠዋል:: ክብርት ዋና ዳይሬክተሯ በንግግራቸው የተጀመሩ የሪፎርም እና የዲጂታላይዜሽን ሥራዎችን አጠናክሮ በመቀጠል ተቋሙ የተቀመጡትን ስትራቴጂካዊ ግቦች እንዲያሳካ የመላው ሠራተኛና አመራር የተቀናጀ ጥረት አስፈላጊ መሆኑን አሰምረውበታል።