General

በመንግስት ግዥና ንብረት አስተዳደር አዋጅ ቁጥር 1333/2016 አንቀጽ 12  ንዑስ አንቀጽ 22 ላይ ለኢፌዴሪ የመንግስት ግዥና ንብረት ባለስልጣን ከተሰጡት ተግባርና ኃላፊነቶች መካከል  አንዱ ከሚመለከታቸው አካላት ጋር በመሆን በጤና ወይም በአካባቢ ላይ ጉዳት የሚያስከትሉ ጊዜያቸው ያለፈባቸው አደገኛ ኬሚካሎች ወይም የኬሚካል ውጤቶች፣ ከአገልግሎት ውጭ የሆኑ የኤሌክትሮኒክ ዕቃዎች፣ መድኃኒቶች፣ ጨረራ አመንጪ ዕቃዎች፣ የኢንዱስትሪ ዝቃጮችና የግብርና ተረፈ ምርቶች አያያዝና አጠባበቅ፣ እንዲሁም አወጋገድ ላይ ጥናት በማከናወን የአሠራር ሥርዓት እንዲዘረጋ ማድረግ መሆኑ ተደንግጓል።

ስለሆነም ይህን ተግባሩን እውን ለማድረግ ባለስልጣኑ የፌዴራል መንግስት ተቋማት በጤናና በአካባቢ ላይ ጉዳት ሊያስከትሉ የሚችሉ ከአገልግሎት ውጪ የሆኑ ንብረቶች አያያዝ፣ አጠባበቅ እና አወጋገድ ላይ ከአዲስ አበባ ሳይንስና ቴክኖሎጂ ዩኒቨርሲቲ ጋር በመተባበር ጥናት እንዲጠና አድርጓል፡፡ ጥናቱን እና የሌሎች ሀገራት ተሞክሮዎችን መሰረት በማድረግ የአፈጻጸም ማንዋል አዘጋጅቷል።

ባለሥልጣኑ ያዘጋጀው ማንዋል በጥልቀት ሲቃኝ ምን ይመስላል የሚለውን ሀሳብ መነሻ በማድረግ ከባለስልጣኑ የመንግስት ግዥና ንብረት ማሻሻያ እና አቅም ግንባታ መሪ ሥራ አስፈጻሚ አቶ መላኩ ተጓዴ ጋር ያደረግነውን ቆይታ እንደሚከተለው እናቀርባለን፡፡

 በጤናና በአካባቢ ላይ ጉዳት ሊያስከትሉ የሚችሉ ከአገልግሎት ውጪ የሆኑ ንብረቶች አያያዝ፣ አጠባበቅ እና አወጋገድ ችግር ምን ያህል አሳሳቢ ነው? የመፍትሔው አስፈላጊነትስ ምን ይመስላል ?

   አቶ መላኩ ፡ በመንግሥት አስተዳደር ሂደት ውስጥ የጤና፣ የምርምር፣ የትምህርት፣ የግብርና እና የቴክኖሎጂ ዘርፎች መስፋፋትን ተከተሎ በመንግሥት ተቋማት ውስጥ የሚፈጠሩና የሚከማቹ በጤናና በአካባቢ ላይ ጉዳት ሊያስከትሉ የሚችሉ ከአገልግሎት ውጪ የሆኑ ንብረቶች መጠንና ዓይነት ከጊዜ ወደ ጊዜ በከፍተኛ ሁኔታ እየጨመረ ይገኛል።

በየተቋማቱ በየዕለቱ በሚከናወኑ ሰፊ የአገልግሎትና የሥራ ሂደቶች ምክንያት ጊዜያቸው ያለፈባቸው አደገኛ ኬሚካሎች፣ ከአገልግሎት ውጭ የሆኑ የኤሌክትሮኒክስ ዕቃዎች (E-Waste)፣ የአገልግሎት ጊዜ ያለፈባቸው መድኃኒቶች፣ የጨረራ አመንጪ ቁሳቁሶች፣ የኢንዱስትሪ ዝቃጮች እና የግብርና ኬሚካሎች መፈጠራቸው የማይቀር ተቋማዊ እውነታ ሆኗል።

እነዚህ አደገኛ ተረፈ ምርቶች ከተፈጠሩበት ጊዜ ጀምሮ በጥንቃቄ ካልተያዙ፣ ደህንነቱ በተጠበቀ ስፍራ ካልተከማቹ፣ በጥንቃቄ ካልተጓጓዙ ወይም በሳይንሳዊ መንገድ ካልተወገዱ  በሰው ልጅ ጤና፣ በውሃ ሀብቶች፣ በአፈር፣ በአየር እና በብዝሃ-ሕይወት ላይ ከፍተኛ ችግር ያመጣሉ። በተጨማሪም ጥንቃቄ የጎደለው አያያዝ ተቋማቱን ለድንገተኛ የእሳት አደጋና ፍንዳታ፣ ለከፋ መመረዝ እና ለሥራ ቦታ የደህንነት ስጋቶች መዳረጋቸው አይቀርም።

ስለሆነም ይታይ የነበረውን ክፍተት ለመሙላት ባለሥልጣኑ ከገንዘብ ሚኒስቴር፤ ከአካባቢ ጥበቃ ባለሥልጣን እና ከሚመለከታቸው አካላት ጋር በመተባበር አዲሱን የፌዴራል መንግሥት ተቋማት በጤናና በአካባቢ ላይ ጉዳት ሊያስከትሉ የሚችሉ ከአገልግሎት ውጪ የሆኑ ንብረቶች አያያዝ፣ አጓጓዝ፣ አጠቃቀም እና አወጋገድ ማንዋል አዘጋጅቶ ወደ ሥራ እንዲገባ አድርጓል።

********* ይቀጥላል!

ውድ የኢትዮጵያ ሕዝብ፣ የተቋማችን ተገልጋዮች፣ ባለድርሻ አካላት፣ አቅራቢዎች፣ የልማት አጋሮችና የግዥ ማኅበረሰብ፣

እንኳን ለ2019 ዓ.ም. አዲስ ዓመት በሰላም፣ በጤና፣ በደስታና በተስፋ አደረሳችሁ!

አዲስ ዓመት ያለፈውን በመገምገም፣ ከተሞክሮአችን በመማርና ለተሻለ ነገ አዲስ ተስፋና ቁርጠኝነት የምንሰንቅበት ወቅት ነው። 2019 ዓ.ም. ለሀገራችን የሰላም፣ የአንድነት፣ የእድገትና የብልጽግና ዓመት እንዲሆን ከልብ እመኛለሁ።

የፌዴራል የመንግሥት ግዥና ንብረት ባለሥልጣን በአዲሱ ዓመትም የመንግሥት ግዥና  ንብረት አስተዳደር ሥርዓትን የበለጠ ግልጽ፣ ተጠያቂ፣ ቀልጣፋ፣ ፍትሐዊና ዘመናዊ ለማድረግ በቁርጠኝነት ይሰራል።

በተለይም የኢ-ግዥ ሥርዓታችንን በማጠናከር፣ የዲጂታል ለውጡን በማፋጠን፣ የተገልጋዮችን የአገልግሎት ልምድ በማሻሻል፣ የግዥ ሥርዓቱን በተገቢው መልኩ በማስተዳደርና የሕዝብ ሀብት በብቃትና በተጠያቂነት እንዲጠቀም በማድረግ የበለጠ ውጤት ለማምጣት ተዘጋጅተናል።

ይህንን የለውጥ ጉዞ ለማሳካት የመንግሥት ተቋማት፣ አቅራቢዎች፣ የልማት አጋሮች፣ ባለሙያዎች፣ ተገልጋዮችና መላው ሕዝብ የሚያደርጉት ትብብርና ተሳትፎ ወሳኝ ነው። ለምታደርጉት ትብብር፣ ድጋፍና ገንቢ ግብረመልስ ከልብ አመሰግናለሁ።

የህዝብ ሀብት የጋራ ሀብታችን ነው፤ የሕዝብ እምነትም የጋራ ኃላፊነታችን ነው። በታማኝነት፣ በሙያዊ ብቃት፣ በፈጠራና በትብብር የተሻለ የመንግሥት ግዥና ንብረት አስተዳደር ሥርዓት በጋራ እንገንባ።

በድጋሚ፣ ለመላው የኢትዮጵያ ሕዝብ፣ ለተገልጋዮቻችንና ለሁሉም ባለድርሻ አካላት የሰላም፣ የጤና፣ የፍቅር፣ የተስፋና የብልጽግና ዓመት እንዲሆን እመኛለሁ።

እንኳን ለ2019 ዓ.ም. አዲስ ዓመት አደረሳችሁ!

መልካም አዲስ ዓመት!

(ጳጉሜን 4/2018 ዓ.ም| አዲስ አበባ) – የፌደራል የመንግስት ግዥ እና ንብረት ባለስልጣን “የህብር ቀን”ን እና የ2019 አዲስ አመትን አስመልክቶ ከተቋሙ ዝቅተኛ ተከፋይ ሰራተኞች ጋር ያከበረ ሲሆን ለሰራተኞቹም ልዩ ልዩ ስጦታዎችን አበርክቷል።

ባለስልጣኑ በክረምቱ ወራት የተለያዩ ማህበራዊ ተግባራትን ሲያከናውን የቆየ መሆኑ የሚታወስ ሲሆን በተለይም በሜቄዶኒያ የአረጋውያንና የአእምሮ ህሙማን ማዕከል በመገኘት የምገባ መርሃ ግብር ማካሄዱ እንዲሁም በቤንሻንጉል ጉሙዝ ክልል ካማሺ ዞን የቅድመ-መደበኛ ትምህርት ቤት ግንባታ ማስጀመሩ ካከናወናቸው ማህበራዊ ሀላፊነቶች በጥቂቱ የሚጠቀሱ ናቸው።

በመድረኩ ላይ የተገኙት የባለስልጣኑ ዋና ዳይሬክተር ክብርት ወ/ሮ መሰረት መስቀሌ በንግግራቸው መተሳሰብ፣ መተጋገዝ እና መተባበር የቆየና የጠነከረ ኢትዮጵያዊ እሴት መሆኑን አውስተዋል። አክለውም ሰራተኞቹ የደመወዛቸው ዝቅተኛ መሆን ሳይገድባቸው ለተቋሙ ስኬት ላበረከቱት አስተዋጽዖ እና ላሳዩት የላቀ ትጋት የከበረ ምስጋና አቅርበዋል።

“እያንዳንዱ የተቋማችን ተግባር እርስ በእርስ የተሳሰረ በመሆኑ በቅንጅት ስንሰራ ውጤታማነታችን ይጎላል” ያሉት ዋና ዳይሬክተሯ ተቋሙ ሁልጊዜም ቢሆን ከሰራተኞቹ ጎን እንደሚቆም አረጋግጠዋል።

በመጨረሻም በመጪው 2019 አዲስ ዓመት ሰራተኞቹ የበለጠ በተነሳሽነት፣ በቅንነትና በታማኝነት አገልግሎት የሚሰጡበት የመተሳሰብና የስኬት ዘመን እንዲሆንላቸው የአዲስ ዓመት መልካም ምኞታቸውን አስተላልፈዋል።

(ጳጉሜን 04/2018 ዓ.ም|አዲስ አበባ) – የመንግስት ግዥና ንብረት ባለስልጣን የሰራተኞችን ተነሳሽነት ለማሳደግ፣ አብሮነትን ለማጠናከር እና የ2019 የአዲስ ዓመት ዋዜማ ለማከበር ያለመ ልዩ የአብሮነት መርሃ-ግብር አካሄደ።

በመርሃ-ግብሩ ላይ በ2018 በጀት ዓመት የተከናወኑ አበይት ሁነቶችን እንዲሁም የመንግስት ኤሌክትሮኒክ ግዥ (e-GP) ሂደት፣ አፈጻጸምና ስኬቶችን የሚያሳዩ አጫጭር ቪዲዮዎች ለታዳሚው ቀርበዋል። ከዚሁ ጎን ለጎንም በሰራተኞች መካከል መቀራረብን የሚያጠናክሩ የጠቅላላ እውቀትና ተቋማዊ ጥያቄና መልስ ውድድር የተካሄደ ሲሆን የ2019 ዓ.ም እቅድና የቃል መግባት መርሃ-ግብርም ተከናወኗል።

በመድረኩ የመንግስት ግዥና ንብረት ባለስልጣን ዋና ዳይሬክተር ክብርት ወ/ሮ መሰረት መስቀሌ ለአዲሱ የ2019 ዓ.ም የእንኳን አደረሳችሁ መልዕክት አስተላልፈዋል። ዋና ዳይሬክተሯ በንግግራቸው ባለስልጣኑ በ2018 በጀት ዓመት በርካታ ስራዎችን ማከናወኑን ጠቁመው ለተመዘገቡት ስኬቶች መላው የባለስልጣኑን ማህበረሰብ አመስግነዋል። ክብርት ዋና ዳይሬክተሯ አክለውም “አዲሱ ዓመት አብሮነታችንን እና ትጋታችንን የበለጠ አጠናክረን የባለስልጣኑን ራዕይ እውን የምናደርግበት እንዲሆን እየተመኘሁ፣ በግል ህይወታችሁም ስኬታማ እንድትሆኑ ከልብ እመኛለሁ” ሲሉ መልካም ምኞታቸውን ገልጸዋል።

በመርሃ-ግብሩ ላይ ከባለስልጣኑ አመራርና ሰራተኞች በተጨማሪ የመንግስት ኤሌክትሮኒክ ግዥ ላይ ልምድ ልውውጥ ላይ የሚገኙት የናይጀሪያ የመንግስት ግዥ ባለስልጣን ልዑካን ቡድን አባላትም ተገኝተዋል።

የልዑካን ቡድኑ ተወካይ በድረኩ ባደረጉት ንግግር ባለስልጣኑ ላደረገላቸው ሞቅ ያለ አቀባበል እና ላካፈላቸው ልምድ ከልብ የመነጨ ምስጋና አቅርበው “በተለይም በዛሬው ዕለት የኢትዮጵያን አዲስ ዓመት ዋዜማ በዚህ መልኩ ከባለስልጣኑ አመራርና ሰራተኞች ጋር ማክበር በመቻላችን እጅግ ደስተኞች ነን” ሲሉ ገልጸዋል።