The FDRE Public Procurement and Property Authority

የፌደራል መንግሥት የግዥና የንብረት አስተዳደር ኤጀንሲ ለመላው ኤጀንሲው ሠራተኞች በሙስና ወንጀል ጥቆማ አቀባበል፤ የአያያዝ ሥርዓትና የማጣራት ስራን በተመለከተ በገንዘብና ኢኮኖሚ ልማት ሚኒስቴር የመሰብሰቢያ አዳራሽ መጋቢት 30 ቀን 2007 ዓ.ም የግንዛቤ ማስጨበጫ ሥልጠና ሰጠ፡፡
የስብሰባው አስተባባሪ አቶ ተስፋዬ መንገሻ በመንግሥት የግዥና የንብረት አስተዳደር ኤጀንሲ የሥነ—ምግባር ከፍተኛ ባለሙያ በመግቢያው ላይ እንደተናገሩት  የሥልጠናው ዓላማ ሙስናንና ሥነ-ምግባርን በሚመለከት ግንዛቤ ለማስጨበጥ ሲሆን፤ በአገራችን ግዥ ከፍተኛውን የመንግሥት በጀት ስለሚይዝና ውስብስብም በመሆኑ ለሙስናና ለብልሹ አሰራር የተጋለጠ ነው፡፡ ለዚህም በአዋጅ ቁጥር 649/2001 ሥልጣን በተሰጠው መሠረት የመንግሥት የግዥና የንብረት አስተዳደር ኤጀንሲ የግዥ አሰራርን ግልጽነትንና ተጠያቂነትን ለማስፈን፤ ለቁጥጥርም እንዲያመች የግንዛቤ ማስጨበጫ ሥልጠና በመስጠት የሚተጋ ተቋም መሆኑን ገልጸው ተሳታፊዎች በጥሞና እንዲከታተሉ በማሳሰብ  ስልጠናውን አስጀምረዋል፡፡
አቶ ደረጀ ምትኬ በፌዴራል የሥነ—ምግባርና ፀረ—ሙስና ኮሚሽን ከፍተኛ የችሎት ዐቃቤ ህግ ሥልጠናውን  የሰጡ ሲሆን፤ በሥልጠናውም ሙስና የአንድ አገርን ዕድገት የሚያቀጭጭ፤ ለመልካም አስተዳደር እንቅፋት የሚሆን ይልቁንም ዜጎች በየተቋማቱ ሊያገኟቸው የሚገቡ የመንግስት አገልግሎቶች በሙስና ሊጎተትና ሊለወጥ የሚችልበት አጋጣሚ ሊኖር እንደሚችል ዕውን መሆኑን አስረድተዋል፡፡
በመቀጠልም ስለ ፌደራል የሥነ—ምግባርና ፀረ—ሙስና ኮሚሽን መሠረታዊ ዓላማዎች፤ ኮሚሽኑ ጥቆማ የሚቀበልበት የህግ ማዕቀፍና  በሥልጣን ክልሉ የሚወድቁ ጉዳዮች፤ ኮሚሽኑ ጥቆማ የሚቀበልበት ሥርዓት፤ ለኮሚሽኑ የቀረበው ጥቆማ   ስለሚጠናቀርበትና ለውሳኔ ስለሚቀርብበት ሁኔታ፤ የመረጃ ገምጋሚና ወሳኝ ኮሚቴ ሥልጣንና ተግባር፤ ለኮሚሽኑ የቀረበው ጥቆማ ስለሚያዝበት ሥርዓት፤ የጠቋሚዎች መብት:-የተወሰነን ውሳኔ የመጠየቅ መብትና ቅሬታ የማቅረብ መብት፤ከኃላፊነት ነፃ ስለመሆንና የጠቋሚዎች ጥበቃ ምን ይመስላል? በሚል ገለፃ አድርገዋል፡፡

በፌዴራል መንግሥት የግዥና የንብረት አስተዳደር ኤጀንሲ በግዥ አፈጻጸም ዙሪያ ከሁሉም የፌዴራል ባለበጀት መ/ቤቶች ለተውጣጡ ሰልጣኞች ከየካቲት 2 እስከ የካቲት 6/2007 ዓ.ም. በኢትዮጵያ ሥራ አመራር ኢንስቲትዩት ለአምስት ቀናት የግንዛቤ ማስጨበጫ ሥልጠና ተሰጠ፡፡
የሥልጠናው ዓላማም በዋናነት በፌዴራል ባለበጀት መ/ቤቶች በግዥ አፈጻጸም ሥርዓትና አጠቃቀም ዙሪያ ያለውን የግንዛቤ እጥረት ለመቅረፍና እንዲሁም ግዥ ከፍተኛውን የመንግሥት በጀት ስለሚይዝ ጥንቃቄ አንደሚያስፈልገውና የተሻለ የግዥ ሥርዓት ለማስፈን ከፍተኛ ጠቀሜታ ያለው እንደሆነ ተገልጿል፡፡

የፌደራል መንግስት የግዥና የንብረት አስተዳደር ኤጀንሲ በመንግስት ቋሚ ንብረት አስተዳደር  እና በስቶክ አስተዳደር ላይ ያተኮረ የግንዛቤ ሥልጠና ለሚመለከታቸው የፌደራል ባለበጀት መ/ቤቶች የስራ ኃላፊዎችና ባለሙያዎች ከየካቲት 9-13 ቀን 2007 ዓ.ም በኢትዮጵያ ስራ አመራር ኢንስቲትዩት ሰጠ፡፡
የፌደራል መንግስት የግዥና የንብረት አስተዳደር ኤጀንሲ የመንግስት ንብረት አስተዳደር ዳይሬክቶሬት የስልጠናና ሙያዊ ድጋፍ ከፍተኛ ባለሙያ የሆኑት አቶ ደበበ ማሞ እና የጥናትና መረጃ ትንተና ከፍተኛ ባለሙያ አቶ ደምሱ አብዲ፣እና የዳይሬክቶሬቱ ባለሙያዎች ደረጀ ኃ/ማሪያም እና ወ/ሮ አያልነሽ ዓለሙ ሥልጠናውን የሰጡ ሲሆን የስልጠናው ዋና ዓላማ ውጤታማና ዘመነዘዊ የስቶክ አስተዳደር መርህንና ሥርዓትን እንዲረዱ፣የስቶክ አስተዳደር ተግባራትን የማከናወን አቅም ለማዳበር በኢ.ፌ.ዲ.ሪ መንግስት የንብረት አስተዳደር እና የስቶክ አስተዳደር ህግጋትንና ሥርዓትን ጠንቅቀው እንዲያወቁ ግንዛቤ ለመስጠት መሆኑን አስታውቀዋል፡፡
አሰልጣኞቹ አጠቃላይ ስያሜን፣ስቶክ መለየትና መመደብን፣መቀበል እና መፈተሽን፣ወጪ ማድረግን ፣የስቶክ መዛግብት የሂሳብ ሥርዓትና ሪፖርትን፣ስቶክ ቆጠራና ቁጥጥርን፣ክምችትን፣ መሰረታዊ ፅንሰ ሃሳቦችና መርሆዎችን፣በመንግስት ይዞታ ስር የሚገኙ ቋሚ ንብረቶች የአስተዳደር መዋቅር፣የመጀመሪያ አጠቃላይ ቆጠራ እንቅስቃሴና የመዝገብ ዝግጅት ሂደት ላይ ሰፋ ያለ ማብራሪያና ገለጻ አድርገዋል፡፡
በተጨማሪም ስለቋሚ ንብረት አወጋገድ፣ሪፖርት ስለማቅረብ፣ለቋሚ ንብረት ዋጋ ስለመመደብ፣የቋሚ ንብረቶች መዛግብት አያያዝ ሂደት፣የቋሚ ንብረቶች ዋጋ በሂሳብ እንዴት እንደሚያዝ፣የቋሚ ንብረቶች የዕርጅና ቅናሽ፣ሌሎች ጉዳዮች እና የአቤቱታ አቀራረብ ሥነ ሥርዓት በሚሉ ርዕሶች ላይ ማብራሪያ ሰጥተዋል፡፡

የፌዴራል መንግሥት የግዥና የንብረት አስተዳደር ኤጀንሲ ለመላው የኤጀንሲው ሠራተኞች የ2007 በጀት ዓመት የመጀመሪያው 6 ወራት እቅድ አፈጻጸምን በተመለከተ ታህሣሥ 29 ቀን 2007 ዓ.ም በገንዘብና ኢኮኖሚ ልማት ሚኒስቴር የስብሰባ አዳራሽ ውይይት አካሄደ፡፡

አቶ ጆንሴ ገደፋ የፌደራል መንግስት የግዥና የንብረት አስተዳደር ኤጀንሲ ም/ዋና ዳይሬክተር በመክፈቻው ሥነ ሥርዓት ላይ እንደተናገሩት የውይይቱ ዓላማ በኤጀንሲው ያሉት ዳይሬክቶሬቶች  ከመልካም አስተዳደር፣ ከለውጥ ሰራዊት እና ከሕዝብ ክንፍ ውይይት አንፃር  ያለፈው 6 ወራት  የዕቅድ አፈጻጸም ሥራ ምን ይመስላል? በሚለው ላይ ለመወያየት መሆኑንና የውይይቱም ተሳታፊዎች ጥያቄ በመጠየቅና አስተያየት በመስጠት በንቃት መከታተልና መሳተፍ እንዳለባቸው አሳስበዋል፡፡
በመቀጠልም አቶ አድማሱ ማሞ የለውጥ ትግበራ ዕቅድ ዝግጅትና ክትትል ዳይሬክቶሬት ዳይሬክተር ከተገልጋይ፣ ከፋይናንስ፣ ከውስጥ አሠራር፣ ከመማማርና ዕድገት እይታዎች አንጻር በየዳይሬክቶሬቱ በ2007 በመጀመሪያው ግማሽ ዓመት የታቀዱ የተከናወኑ ተግባራትና የተገኙ ውጤቶች ላይ ገለፃና ማብራሪያ ሰጥተዋል፡፡
ፋይናንስን በሚመለከት ኤጀንሲው የተመደበለትን በጀት የተገልጋዮችን አቅም ለማገልበትና የተለያዩ አገልግሎቶችን ለመስጠት በጀቱን በቁጠባና በአግባቡ በስራ ላይ ለማዋል ትኩረት የሚሰጠው l መሆኑን እና የውስጥ አሠራርን  ደግሞ የግዥና ንብረት አስተዳደር ሥርዓቱን በማጣጣም ተቀባይነቱን የማሳደግ፣የመረጃ ልውውጥ ስርዓቱን የማሻሻል፣አቤቱታ የማጣራትና ውሳኔ አሰጣጡን ቀልጣፋ ለማድረግ  መሆኑን አስታውቀዋል፡፡

በተጨማሪም የኤጀንሲውን የሥርዓተ—ጾታ ሥራ መሠራቱን እና የ1 ለ5 አደረጃጀት ውይይት እየተካሄደ መሆኑን ገልጸው ዋናው ነገር ተገልጋዮችን ማርካት መሆኑንና ስለአጋጠሙም ችግሮችና የመፍትሄ ሃሳቦች በማንሳት አስረድተዋል፡፡
በቀረበው ገለጻና ማብራሪያ በተሳታፊዎች በርካታ ጥያቄዎችና አስተያየቶች ተነስተው ለጥያቄዎቹ ምላሽ ተሰጥቶባቸዋል፡፡
ለግማሽ ቀን በቆየው የኤጀንሲው የ2ዐዐ7 የመጀመሪያው የ6 ወራት የዕቅድ አፈጻጸም ውይይት ላይ ከ70 በላይ ኃላፊዎች እና ሠራተኞች ተሳታፊ ሆነዋል፡፡
ከመ.ግ.ን.አ.ኤ. የሕዝብ ግንኙነትና ኮሚዩኒኬሽን ዳይሬክቶሬት