የመንግስት ግዥና ንብረት አስተዳደር ኤጀንሲ ከብሔራዊ ፕላን ኮሚሽን እና ከመንግስት ግዥና ንብረት ማስወገድ አገልግሎት ጋር በጋራ በመሆን የዓለም አቀፍ የኤድስ ቀን እና የጸረ—ጾታ ጥቃት ቀን ህዳር 26 ቀን 2009 ዓ.ም. በመንግስት ግዥና ንብረት ማስወገድ አገልግሎት አዳራሽ በድምቀት አከበረ፡፡
አቶ ይገዙ ዳባ የመንግስት ግዥና ንብረት ማስወገድ አገልግሎት ዋና ዳይሬክተር በመክፈቻው ሥነ ሥርዓት ላይ እንደተናገሩት በዚህ ዓመት የዓለም ኤድስ ቀን በዓለም አቀፍ እና በአገራችንም “አሁንም ትኩረት ለኤች. አይ.ቪ መከላከል” በሚል መሪ ቃል እየተከበረ እንደሚገኝና የዚህ በዓል ዓላማም በሽታው እያደረሰ ያለውን ዓለም አቀፋዊና አገራዊ ጉዳት ለመከላከል፣ ብሎም ለማስቆም እንዲሁም በበሽታው የተጎዱ ወገኖችን ለመርዳትና ለመንከባከብ አድሎ እና መገለልን በማስወገድ አገራችንን ጨምሮ የዓለም መንግሥታትና መላው የዓለም ሕብረተሰብ ስለበሽታው ትኩረት ሰጥቶ እንዲንቀሳቀስ ለማስቻል መሆኑን አስረድተዋል፡፡
በመቀጠልም ዋና ዳይሬክተሩ በዘንድሮው ዓመት የዓለም ኤድስ ቀንና የጸረ-ጾታዊ ጥቃት ቀን በጋራ ሲከበር ጾታዊ ጥቃትን በመከላከል የኤች.አይ.ቪ ስርጭት መጠንን ለመቀነስ በሚደረገው እንቅስቃሴ ከፍተኛ አስተዋጽኦ እንደሚኖረው ከግምት በማስገባት መሆኑን ገልጸዋል፡፡
አቶ ከዋኒ ይብራ በብሔራዊ ፕላን ኮሚሽን የጤናና ሥነ—ምግብ ፕላን ከፍተኛ ባለሙያ በዓለም ለ29ኛ በኢትዮጵያ ደግሞ ለ28ኛ ጊዜ የሚከበረውን የኤድስ ቀን በማስመልከት የግንዛቤ ማስጨበጫ የሰጡ ሲሆን፣ በየዓመቱ ቀኑ ሰለሚከበርበት ምክንያት፡- ለህብረተሰቡ ግንዛቤ ለመፍጠር፤ በኤች. አይ.ቪ እና ኤድስ የተጎዱትን ወገኖች ለመርዳትና ለማበረታታት፤ ጥናቶችን ለህብረተሰቡ ለማቅረብና መረጃን ለመስጠት፤ የባለቤትነትን ስሜት ለመፍጠር መሆኑንና በአገር ደረጃም የ2008 ዓ.ም. ኤች.አይ.ቪ. ኤድስ ህክምና አገልግሎት አፈጻጸም ከዕቅድ አንጻር ምን ይመስል እንደነበር፣ አሁንም ያሉት ተግዳሮቶችና ስጋቶች ምን እንደሆኑ እና የባለድርሻ አካላት /የመንግስት ሴክተሮች/ ሚና ጎልቶ መውጣት እንዳለበትና ይህም ከፍተኛ የመንግስት ሃላፊዎችን ቁርጠኝነት እንደሚጠይቅ ገለጻ አድርገዋል፡፡
ወ/ሮ ትብለፅ ቡሽራ የፌዴራል ጠቅላይ አቃቤ ህግ የሆኑት በዓለም ለ26ኛ በኢትዮጵያ ደግሞ ለ11ኛ ጊዜ የሚከበረውን የጸረ—ጾታ ጥቃት ቀንን በሚመለከት ጾታዊ ጥቃትና አካላዊ ሥነ-ልቦና ምንድነው? ጾታን መሰረት አድርገው በህብረተሰቡ፣ በቤት ውስጥ እና በስራ አካባቢ ስለሚያጋጥሙ ጥቃቶች፣ ስለ ህግ ማዕቀፍ ጾታዊ ጥቃትን በሚመለከት ከህገ መንግስቱ አንጻር እየቃኙ የግንዛቤ ማስጨበጫ ሰጥተዋል፡፡
ለግማሽ ቀን የቆየው የዓለም የኤድስ ቀን እና የዓለም አቀፍ የጸረ—ጾታ ጥቃት ቀን በስነ-ፅሁፍና ኤች.አይቪን በሚመለከት በቃል ምስክርነት በመታጀብ የደመቀ ሲሆን የሶስቱም መ/ቤት ሃላፊዎችና ሠራተኞች ተሳታፊ ሆነዋል፡፡
የፌ.መ.ግ.ን.አ.ኤ ህዝብ ግንኙነትና ኮሚዩኒኬሽን ዳይሬክቶሬት
የመንግስት ንብረት አስተዳደር ዳይሬክቶሬት ዳይሬክተር የሆኑት አቶ ትዕግስት ደበበ ሥልጠናዉን የሰጡ ሲሆን፤ ሰለመንግስት ግዥ ታሪካዊ አመጣጥ፣ ስለመንግስት ግዥ ልዩ ባህሪያት እና ኢኮኖሚያዊና ማህበራዊ ፋይዳዎች፣ ስለመንግስት ግዥ ዓላማና መሠረታዊ መርሆዎች ትከከለኛ መጠን፣ጥራት፣ምንጭ፣ዋጋና ጊዜ መሆናቸውን፣ ከአድልዎ ነፃ ሰለሆነ አሠራር፣ግልፅነት፣ ለሕዝብ ተጠያቂነት፣ የሀገር ውስጥ አምራቾችን ሰለማበረታት፣ስለልዩ አሰተያየት፣ ስለመንግሰት ግዥ አጠቃላይ ገፅታ፣ስለግዥ ምንነት፣ ዓይነቶችና ሂደት፣የመንግሰት ግዥ ስለሚመራባቸው ሕጋዊ ሠነዶች፣ በመንግስት ግዥና ንብረት አስተዳደር ላይ ያለው አዋጅና ዋና ዋና ይዘቶች ዘርዘር ያለ ገለጻ አድርገዋል፡፡ 
የመንግስት የግዥና የንብረት አስተዳደር ኤጀንሲ ከመንግስት ግዥና ንብረት ማስወገድ አገልግሎት ጋር በመተባበር በማህጸን ጫፍ ካንሰርና በጡት ካንሰር ላይ ጥቅምት 3 ቀን 2009 ዓ.ም. በመንግስት ግዥና ንብረት ማስወገድ አገልግሎት የስብሰባ አዳራሽ የግንዛቤ ማስጨበጫ ሥልጠና ሰጠ፡፡ወ/ሮ መስከረም ግርማ በፐብሊክ ሰርቪስና የሰው ሀብት ልማት ሚኒስቴር የጤና ባለሙያ የሆኑት ሥልጠናውን የሰጡ ሲሆን፣ ስለ ጡት ካንሰር ምንነት፣ መንስኤዎች፣ ምልክቶች፣ለጡት በሽታ ሊያጋልጡ ስለሚችሉ ልማዶች፣ ሊደረጉ ስለሚገቡ ጥንቃቄዎች፣ የራስን ጡት ስለመመርመር ዘዴ፣ ስለጡት ካንሰር ማረጋገጫ ምርመራዎች ገለጻ አድርገዋል፡፡አሰልጣኟ በዓለማችን በጡት ካንሰር በሽታ በዓመት ከ1 ሚሊዮን በላይ የሚደርሱ ሰዎች የሚጠቁ ሲሆን ከእነዚህ ሰዎች ውስጥ ወደ 75 በመቶ የሚጠጉት ሴቶች መሆናቸውንና በካንሰር በሽታ ምክንያት ለሞት ከተዳረጉ ሰዎች 64.9 በመቶ የሚሆኑት በታደጊ አገሮች የሚገኙ መሆናቸውን የተለያዩ መረጃዎች እንደሚያመላክቱ ገልጸዋል፡፡
በመቀጠልም አሰልጣኟ ስለማህጸን ጫፍ ካንሰር ምንነት፣ መንሰኤዎች፣ ምልክቶችና የማህፀን ካንሰርን ለመከላከል ስለሚደረጉ ጥንቃቄዎች ገለጻ ያደረጉ ሲሆን፣ የማህፀን ጫፍ ነቀርሳ ያመጣሉ ተብለው የሚታመኑ ህዋሶችና ድርጊቶች፣ሂዩማን ፓፒሎማ ቫይረስ፣ ሲጋራ ማጬስ እና ሌሎች ምክንያቶች የሚጠቀሱ መሆኑን ገልጸው፣ሲጋራ አጫሽነትም በዚሁ በሽታ የመጠቃት እድልን ከፍ እንደሚያደርግ እና የማህፀን ጫፍ ነቀርሳ በየትኛውም የዕድሜ ክልል ውስጥ ሊከሰት የሚችል በሽታ ሲሆን በአብዛኛው በ40ዎቹ እና በ50ዎቹ የዕድሜ ክልል ውስጥ ያሉት ሴቶች ለዚህ በሽታ እንደሚጋለጡ አስረድተዋል፡፡በመጨረሻም አሰልጣኟ ከተሳታፊዎች ለተነሱት የተለያዩ ጥያቄዎች መልስ የሰጡና አሰተያየትም የተቀበሉ ሲሆን ሰልጣኞችም ከስልጠናው ጥሩ ገንዛቤ ማግኘታቸውን ገልጸዋል፡፡ለግማሽ ቀን በቆየው በማህጸን ጫፍ ካንሰርና በጡት ካንሰር የግንዛቤ ማስጨበጫ ሥልጠና ላይ የሁለቱም መ/ቤት ሴት ሠራተኞች ተሳታፊ ሆነዋል፡፡